काठमाडौं । नेपालको लिग च्याम्पियनका रुपमा रहेको चर्च ब्वाईज युनाइटेडले भारतको सिक्किममा जारी ४१औं अल इण्डिया गभनर्स गोल्डकपमा आइतबार हार बेहोरेको छ ।

प्रतियोगितामा बाई पाएर सोझै क्वाटरफाइनल खेलेको चर्च ब्वाईजले भारतको आई लिग क्लब राजस्थान युनाइटेडसँग ३–१ को हार बेहोर्न पुगेको हो । जित हात पारेको राजस्थान भने सेमिफाइनलमा पुगेको छ ।

खेलमा शुरुवाती अग्रता भने चर्च ब्वाईजले नै लिएको थियो । खेलको छैटौं मिनटमा दिनेश हेन्जनको गोलबाट अग्रता लिएको चर्च ब्वाईजले त्यो अग्रता पहिलो हाफ मै गुमाउन पुग्यो ।

खेलको २२औं मिनटमा राजस्तानका लागि विलियम पाउलिनखुमले बराबरी गोल फर्काए । त्यस्तै खेलको २८ र ७०औं मिनटमा नाओबा मेटीले दुई गोल गर्दै राजस्थानको जित पक्का गरे ।

चर्च ब्वाईजले टोलीमा रोहित चन्द, सुरज ठकुरी, समिर तामाङ, दिप कार्की, रोहन कार्की जस्ता खेलाडीहरुलाई सामेल गरेको थियो । यो हारसँगै गभनर्स गोल्डकपमा सहभागि नेपालको एक्लो टोली चर्च ब्वाइजको चुनौति पनि समाप्त भएको छ ।

Photo: Sikkim FA