काठमाडौं । केही दिन अघि नै एन्फा कम्प्लेक्समा शुरु भईसकेको राष्ट्रिय लिग पुरुष फुटबल प्रतियोगिताको औपचारिक उद्घाटन शुक्रबार भएको छ ।

दशरथ रंगशालामा भएको उद्घाटन कार्यक्रममा प्रमुख अतिथी युवा तथा खेलकुद मन्त्री बब्लु गुप्ताले रेफ्रीलाई बल दिंदै खेलको उद्घाटन गरेका थिए । सो अवसरमा खेलकुद मन्त्रालयका सचिव लोकनाथ पौडेल, एन्फा अध्यक्ष पंकज विक्रम नेम्वाङ लगायतको पनि उपस्थिति रहेको थियो ।

त्यसपश्चात् भएको खेलमा मच्छिन्द्र फुटबल क्लबले एनआरटीलाई १–० ले हराउँदै प्रतियोगितामा विजयी शुरुवात गर्यो । खेलको ६२औं मिनटमा आलिक श्रेष्ठले गरेको एक मात्र गोल खेलको निर्णायक गोल बन्यो ।

लिगमा कुल १७ टोलीहरु सहभागि छन् । सिंगल राउण्ड रोबिनका आधारमा हुने प्रतियोगितामा कुल १३६ खेलहरु हुनेछन् । प्रतियोगिताको विजेताले उपाधिसहित नगद ५० लाख हात पार्नेछ ।