मिक्लाजुङ । आयोजक कन्याटार गोल्डकप सञ्चालन समिति पाँचथरमा जारी प्रथम कन्याटार गोल्डकप आमन्त्रित नकआउट फुटबल प्रतियोगिताको सेमिफाइनलमा प्रवेश गरेको छ ।

सोमबार सम्पन्न तेस्रो क्वाटरफाइनलमा कन्याटारले माङसेबुङ गाउँपालिका, इलामलाई २–१ ले हराउँदै अन्तिम चारमा स्थान बनाएको हो । आयोजक कन्याटारको जितमा दुवै गोल उपेन्द्र राईले गरे । उता पराजित माङसेबुङका लागि भने आशिष लावतीले एक मात्र गोल फर्काएका थिए । खेलमा कन्याटारका दुई गोलकर्ता उपेन्द्र राई म्यान अफ द म्याच घोषित भए ।

प्रतियोगिता अन्तर्गत बैशाख २९ गते मंगलबारको चौथो क्वाटरफाइनल खेल दशमी युवा क्लब, इलाम र राइजिङ स्टार स्र्पोटिङ क्लब, पाँचथरबीच हुने आयोजकले जानकारी दियो ।

कन्याटार गोल्डकप सञ्चालन समिति, मिक्लाजु–६, पाँचथरको आयोजनामा जारी प्रतियोगिताको विजेताले उपाधिसहित नगद १,११,१११ रुपैयाँ हात पार्नेछ भने उपविजेताले ५५,५५५ रुपैयाँसहित ट्रफी, मेडल र प्रमाणपत्र प्राप्त गर्नेछ । फाइनल खेल भने जेठ १ गतेका दिन हुनेछ ।