काठमाडौं । शहिद स्मारक सी डिभिजन लिगतर्फ आफ्नो अन्तिम खेलमा सामाजिक युवा क्लबले रोमाञ्चक जितका साथ सिजनको समापन गरेको छ । सोमबार भएको दिनको पहिलो खेलमा सामाजिकले गोलबजार स्र्पोटस क्लबलाई २–१ ले हरायो ।

एन्फा कम्प्लेक्समा भएको खेलमा सामाजिकका लागि वसन्त राना र विजय दोङले गोल गरे । उता पराजित गोलबजारका लागि भने रिवाज बस्नेतले एक मात्र गोल फर्काए ।

यो जितपछि १३ खेलबाट २२ अंक जोडेको सामाजिक लिगतालिकाको तेस्रो स्थानमा उक्लिएको छ । पराजित गोलबजार भने ७ अंकका साथ पुछारमा रहेर सिजनको समापन गरेको छ ।

सोमबार नै भएको अर्को खेलमा स्र्पोटस एकेडेमी साँगा र स्वयम्भु क्लबले गोलरहित बराबरी खेल्दै अंक बाँडे । यो नतिजापछि १३ खेलबाट १६ अंक जोडेको साँगा लिगतालिकाको नवौं स्थानमा छ । १४ अंक जोडेको स्वयम्भु भने १२औं स्थानमा छ ।