काठमाडौं । एन्फा युथ लिग फुटबल प्रतियोगिता अन्तर्गत आइतबारदेखि शुरु भएको पाँचौं चरणको खेलतर्फ मच्छिन्द्र फुटबल क्लबले तेस्रो जित दर्ता गर्दा संकटा क्लब र एनआरटीले बराबरी खेलेका छन् ।

एन्फा कम्प्लेक्समा भएको खेलमा मच्छिन्द्रले एपिएफ फुटबल क्लबमाथि २–१ को जित निकाल्यो । यो नतिजापछि ५ खेलबाट ११ अंक जोडेको मच्छिन्द्र शिर्ष स्थानमा उक्लिएको छ । पराजित एपिएफ ७ अंकका साथ छैठौं स्थानमा छ ।

त्यस्तै आइतबार नै भएको अर्को खेलमा संकटा क्लब र एनआरटीले २–२ गोलको रोमाञ्चक बराबरी खेल्दै अंक बाँडेका छन् । यो नतिजापछि संकटाको ५ खेलबाट ३ अंक भएको छ र लिगतालिकाको शिर्ष दशभित्र उक्लिएको छ । उता एनआरटीको खातामा भने १० अंक भएको छ र शिर्ष तीनमा उक्लिएको छ ।

डबल राउण्ड रोबिन लिगका आधारमा हुने प्रतियोगितामा कुल १२ टोलीहरु सहभागि छन् । लिगको शिर्ष स्थान हासिल गर्ने टोली विजेता बन्नेछ । विजेताले उपाधिसहित नगद १ लाख हात पार्नेछ भने दोस्रो स्थान हासिल गर्ने टोलीले ५० हजार प्राप्त गर्नेछ ।