काठमाडौं । जारी एन्फा महिला लिग राष्ट्रिय फुटबल प्रतियोगितामा बागमती युवा क्लब, सर्लाहीले उत्कृष्ट जितका साथ प्रतियोगितामा शानदार शुरुवात गरेको छ ।

सोमबार सातदोबाटो स्थित एन्फा कम्प्लेक्समा भएको खेलमा बागमतीले सुदुरपश्चिम प्रदेशलाई ५–१ ले हराउँदै लिगमा उत्कृष्ट शुरुवात गरेको हो ।

बागमतीका लागि अस्मिताले ह्याट्रिक पूरा गरिन् । त्यस्तै सहारा लिम्बु र आरती भुजेलले थप एक–एक गोल गरे । उता पराजित सुदुरपश्चिमका लागि तुलसा बोहराले एक मात्र सान्त्वना गोल फर्काईन् ।

खेलमा बागमतीका लागि ह्याट्रिक गरेकी अस्मिता खवास नै खेलको प्लेयर अफ द म्याच घोषित भईन् ।

कुल १० टोलीहरु सहभागि लिग विजेताले उपाधिसहित नगद १० लाख हात पार्नेछ भने उपविजेताले ५ लाख प्राप्त गर्नेछ । त्यस्तै विधागततर्फ पनि आकर्षक नगद पुरस्कारको व्यवस्था गरिएको छ ।