बिराटनगर । संघर्षपुर्ण जितका साथ सनसाईन इङलिस स्कुल यहाँ जारी दोस्रो डिपिएस रनिङ शिल्ड अन्तरविद्यालय छात्र फुटबल प्रतियोगिताको फाइनलमा प्रवेश गर्ने पहिलो टोली बनेको छ ।

पहिलो सेमिफाइनलतर्फ सनसाईनले मोर्डन इरा स्कुललाई टाईब्रेकरमा हरायो । त्यसअघि निर्धारित समयको रोमाञ्चक खेल दुवै टोलीले १–१ गोलको बराबरी खेलेका थिए । निर्धारित समयतर्फ सनसाईनका लागि आकाश पासवानले गोल गरेका थिए भने मोर्डन इराका लागि उनिष कार्कीले गोल गरेका थिए ।

पेनाल्टी शुटआउटमा भने सनसाईनले मोर्ड इरामाथि ५–४ को जित निकाल्दै फाइनल स्थान सुरक्षित गर्न सफल भयो ।

दिल्ली पब्लिक स्कुल, बिराटनगरको आयोजनामा जारी प्रतियोगितामा बिराटनगरका कुल १२ विद्यालयका फुटबल टोलीहरुले सहभागिता जनाएका छन् । प्रतियोगिताको फाइनल खेल यही मंसिर २१ गतेका दिन हुनेछ ।