काठमाडौं । एन्फा महिला लिग राष्ट्रिय फुटबल प्रतियोगिता अन्तर्गत उपाधिको बलियो प्रत्याशी एपिएफ फुटबल क्लबले पनि प्रतियोगितामा उत्कृष्ट शुरुवात गरेको छ ।

शनिबार भएको खेलमा एपिएफले बागमती युवा क्लबलाई ५–१ को फराकिलो अन्तरले हरायो । एपिएफको जितमा रश्मी कुमारी घिसिङले ह्याट्रिक पूरा गर्दा गीता राना र सबिता राना मगरले थप एक–एक गोल गरे ।

उता बागमतीका लागि पुष्पा कुमारी खड्काले एक मात्र सान्त्वना गोल फर्काउकी थिईन् । खेलमा ह्याट्रिक गरेकी एपिएफकी रश्मी कुमारी घिसिङ प्लेयर अफ दि म्याच समेत चुनिईन् ।