कञ्चन । ‘स्वास्थ्यका लागि खेलकुद, राष्ट्रका लागि खेलकुद’ भन्ने नाराका साथ हिमालय सामुदायिक विकास केन्द्र, कञ्चन–४, डियोबजारमा आउँदो फागुन ३ देखि १४ गतेसम्म १६औं कञ्चन कप खुला नकआउट फुटबल प्रतियोगिता हुने भएको छ ।

कञ्चन गाउँपालिका–४, डियोबजार स्थित आयोजक कै खेलमैदानमा हुने प्रतियोगिताको माघ २९ गतेसम्म टिमदर्ता खुला गरिएको खेल संयोजक संजय बिकले जानकारी दिए । साथै टिमदर्ता शुल्क १०००० तोकिएको पनि खेल संयोजक बिकले बताए ।

कञ्चन गाउँपालिका, रुपन्देहीको विशेष सहयोग रहने प्रतियोगिताको विजेताले उपाधिसहित नगद २ लाख १ हजार हात पार्नेछ भने उपविजेताले १ लाख १ हजारसहित ट्रफी, मेडल र प्रमाणपत्र प्राप्त गर्ने आयोजक संस्थाका अध्यक्ष प्रकाश थापाले जानकारी दिए ।

त्यस्तै विधागततर्फ प्रतियोगिताको सर्वोत्कृष्ट खेलाडीले नगद ७५०० सहित ट्रफी हात पार्नेछ भने उत्कृष्ट गोलरक्षक, सर्वाधिक गोलकर्ता र उदीयमान खेलाडीहरुलाई जनही ५५०० र ट्रफी प्रदान गरिने पनि अध्यक्ष प्रकाश थापाले बताए ।