काठमाडौ । सोमबारदेखि शुरु चारदेशीय महिला च्याम्पियनसिपमा दावेदार मध्ये एकका रुपमा देखिएको म्यानमारले प्रतियोगितामा उत्कृष्ट शुरुवात गरेको छ ।

दशरथ रंगशालामा भएको उद्घाटन खेलमा म्यानमारले लेबनानमाथी ३-१ को जित निकाल्दै उत्कृष्ट शुरुवात गरेको हो । खेलमा चारै गोल दोस्रो हाफमा सम्पन्न भए ।

खेलको ५७औं मिनेटमा विन थेङिको गोलबाट म्यानमारले खेलमा अग्रता बनाएको थियो । तर, लगत्तै ६०औं मिनेटमा लैला इस्कन्दरले लेबनानका लागि बराबरी गोल फर्काईन ।

बराबरी गोलपछी थप आक्रमक बनेको म्यानमारका लागि ७२औं मिनेटमा श्वे यीले दोस्रो गोल गरीन भने ७५औं मिनेटमा सन थावले तेस्रो गोल गर्दै टोलीको जित पक्का गरिन ।

म्यानमारले आफ्नो आगामी खेल बिहीबार किर्गिस्तानसँग खेल्नेछ भने सोही दिन दोस्रो खेलमा लेबनानले नेपालको सामना गर्नेछ ।