काठमाडौं । आइतबारदेखि शुरु भएको केपी ओली कप अन्तर्राष्ट्रिय आमन्त्रण नकआउट फुटबल प्रतियोगितामा सशस्त्र प्रहरीको एपिएफ फुटबल क्लबले विजयी शुरुवात गरेको छ ।

एन्फा कम्प्लेक्समा भएको उद्घाटन खेलमा एपिएफले दावेदार मानिएको ब्ल्याक बुल्स फुटबल क्लब, उज्वेकिस्तानलाई टाईब्रेकरमा हरायो । निर्धारित समयको खेल गोलरहित बराबरीमा टुंगिएपछि टाईब्रेकरमा एपिएफले ४–३ ले नतिजा आफ्नो पक्षमा पारेको हो ।

एपिएफले अब १३ गते हुने क्वाटरफाइनलमा संकटा फुटबल क्लबसँग खेल्ने छ । प्रतियोगिता अन्तर्गत फागुन १२ गते सोमबार दुई खेलहरु हुनेछन् । एन्फा कम्प्लेक्स मै हुने पहिलो खेलमा ११ बजे त्रिभुवन आर्मी फुटबल क्लब र नेपाल पुलिस क्लब भिड्ने छन् भने ३ बजे हुने दोस्रो खेलमा केपी ओली एफसी र न्युरोडटिम (एनआरटी) भिड्ने छन् ।

राष्ट्रिय युवा संघ नेपालको आयोजनामा शुरु प्रतियोगिताको विजेताले उपाधिसहित नगद १५,११,१११ रुपैयाँ हात पार्नेछ भने उपविजेताले ५ लाख प्राप्त गर्नेछ । फाइनल खेल यही फागुन १९ गतेका दिन हुनेछ ।