काठमाडौं (एजेनसी) । सन् २०२६ को फिफा विश्वकपको एसियाली छनौटतर्फ तेस्रो चरणका छनौट खेलहरु बिहीबारदेखि शुरु भएका छन् । जसमा एसियाका केही बलिया टोलीहरुले जित निकाल्दा केही दावेदार टोलीहरु निराश बनेका छन् ।

समूह ए तर्फ भएका तीन खेलहरुमा उज्वेकिस्तानले उत्तर कोरियालाई १–० ले हराउँदा इरानले पनि किर्गिस्तानमाथि समान १–० को जित निकाल्यो । त्यस्तै युएईले भने कतारमाथि ३–१ को प्रभावशाली जित दर्ता गर्यो ।

समूह बी तर्फ बलियो दक्षिण कोरियाले प्यालेस्टाईनसँग गोलरहित बराबरी खेलेको छ । सोही समूहको अर्को खेलमा इराकले ओमानमाथि १–० को जित निकाल्दा जोर्डन र कुवेतले १–१ को बराबरी खेलेका छन् ।

त्यसैगरी समूह सी तर्फ एसियन पावर हाउस जापानले चीनमाथि ७–० को फराकिलो जित निकाल्यो । सोही समूहको अर्को खेलमा अष्ट्रेलियाले बहराईनसँग १–० को स्तब्धपुर्ण हार बेहोर्दा साउदी अरेबियाले इण्डोनेसियासँग १–१ गोलको बराबरी खेल्यो ।

तीन समूहमा विभाजित कुल १८ टोलीहरु मध्ये प्रत्येक समूहको शिर्ष टोली सन् २०२६ का लागि सोझै छनौट हुनेछन् । त्यस्तै प्रत्येक समूहको तेस्रो स्थान हासिल गर्ने टोलीहरुले भने चौथो चरणको छनौट खेलहरु खेल्नेछन् ।