फुङलिङ । पथरी–११ फुटबल क्लब, मोरङ यहाँ जारी ताप्लेजुङ गोल्डकप अन्तर्राष्ट्रिय आमन्त्रण फुटबल प्रतियोगिताको सेमिफाइनलमा प्रवेश गर्ने तेस्रो टोली बनेको छ । शनिबार भएको तेस्रो क्वाटरफाइनलमा फिदिम स्र्पोटिङ क्लब, पाँचथरलाई ०–२ ले हराउँदै पथरी सेमिफाइनलमा प्रवेश गरेको हो ।

श्री भानु जन माविको खेलमैदानमा भएको खेलको ३८औं मिनटमा दिपक राईले पहिलो गोलको खाता खोलेका थिए । त्यस्तै दोस्रो हाफको पाँचौं मिनट मै निरज परियारले दोस्रो गोल गर्दै पथरीको जित सुनिश्चित गरेका थिए ।

खेलमा पथरीका निरज परियार म्यान अफ द म्याच घोषित भए । उनले पुरस्कार वापत नगद ५ हजार र मेडल हात पारे । पथरीले पहिलो सेमिफाइनलतर्फ भदौ १८ गतेका दिन जुट विकास फुटबल एकेडेमी, इटहरीसँग भिड्नेछ ।

प्रतियोगिता अन्तरगत भदौ १७ गते आइतबारको अन्तिम क्वाटरफाइनल खेल रेड स्टार फुटबल क्लब, बिर्तामोड, झापा र युनाइटेड खर्साङ फुटबल क्लब, दार्जिलिङ, भारतबीच हुने आयोजकले जानकारी दियो ।

लाखेजात्रा सञ्चालन समिति, ताप्लेजुङको आयोजनामा जारी प्रतियोगिताको विजेताले उपाधिसहित नगद ३ लाख ११ हजार हात पार्नेछ भने उपविजेताले १ लाख ५१ हजार प्राप्त गर्नेछ । फाइनल खेल यही भदौ २० गतेका दिन हुनेछ ।