खसीबजार । ‘सम्बन्ध हाम्रो सबैभन्दा राम्रो, सामाजिक कार्यलाई अगाडी बढाउने जिम्मेवारी हाम्रो’ नाराका साथ स्थापित दाजुभाई समूह फुटबल क्लब र दाजुभाई समूह, दोहा, कतारको संयुक्त आयोजनामा यही साउन १० गतेदेखि दोस्रो दाजुभाई कप सेभेन ए साईड फुटबल प्रतियोगिता हुने भएको छ ।

त्रियुगा नगरपालिका–१०, खसीबजार स्थित गंगा खेल मैदानमा हुने प्रतियोगिताको खेलतालिका पनि सार्वजनिक गरिएको छ । प्रतियोगिताको पहिलो दिन दुई खेलहरु हुनेछन् । साउन १० गते २ बजे हुने उद्घाटन खेलमा इलेभेन स्टार एफसी र दमौती एफसी भिड्ने छन् भने सोही दिन ४ बजे हुने दोस्रो खेलमा स्वर्णिम एफसी ड्याडी एफसी भिड्ने छन् ।

प्रतियोगिताको विजेताले उपाधिसहित नगद ४० हजार हात पार्नेछ भने उपविजेताले २० हजारसहित ट्रफी, मेडल र प्रमाणपत्र प्राप्त गर्नेछ । त्यस्तै विधागततर्फ उत्कृष्ट हुने खेलाडीहरुलाई पनि उचित पुरस्कारको व्यवस्था गरिएको आयोजकले जानकारी दियो । कुल १२ टोलीहरुको सहभागिता रहेको प्रतियोगिताको फाइनल खेल साउन १९ गतेका दिन हुनेछ ।