बुटवल । नेपाली राष्ट्रिय फुटबल टोलीका पूर्व अन्तर्राष्ट्रिय खेलाडी बसन्त थापालाई गृहजिल्ला रुपन्देहीमा सम्मान गरिएको छ । जिल्ला कै पुरानो क्लब मध्ये एक झरना स्पोर्टस क्लब, कुञ्जलापुर, तिलोत्तमाले एक कार्यक्रमका बीच सम्मान गरेको हो ।

खेलाडी बसन्त थापालाई झरना स्पोर्टस क्लबका अध्यक्ष गंगा बहादुर राना, कोषाध्यक्ष तथा टिम प्रशिक्षक निर्मल थापा, क्लबका सचिव सिजन थापा लगायतका पदाधिकारीहरुले स्वागतसँगै सम्मान गरेका थिए । सो अवसरमा बसन्त थापाले फुटबलको माध्यमबाट जिल्ला हुँदै देशका लागि गरेको योगदानबारे चर्चा गर्दै उनलाई धन्यवाद समेत दिइएको थियो ।

बुटवल भेट्रान र झरना स्पोर्टस भेट्रान बीचको मैत्रीपूर्ण फुटबल म्याचका लागि कुञ्जलापुर पुगेका बसन्त थापालाई सोही अवसरमा सम्मान गरिएको हो । थापाले सम्मान ग्रहण गर्दै गृहजिल्लामा पाएको यो सद्भाव, आत्मियता र सम्मानले आफूलाई निकै खुशी मिलेको बताए । साथै उनले झरना स्पोर्टस क्लब परिवारलाई धन्यवाद दिंदै आफूलाई सम्मान, समर्थन र साथ दिने सबैप्रति आभार प्रकट गरे ।