पिपरिचापा । सहज जित हात पार्दै आयोजक गौतम बुद्ध सामुदायिक विकास केन्द्र, कञ्चन–५, पिपरिचापा यहाँ जारी प्रथम गौतम बुद्ध कप खुला नकआउट फुटबल प्रतियोगिताको सेमिफाइनलमा प्रवेश गरेको छ ।

आइतबार भएको चौथो तथा अन्तिम क्वाटरफाइनलमा गौतम बुद्धले फर्साटिकर युवा क्लब, फर्साटिकरलाई ६–१ ले हराउँदै अन्तिम चारमा प्रवेश गरेको हो ।

गौतम बुद्धका लागि एरोन थापाले ह्याट्रिक गरे । थप दुई गोल अरुण चौधरीले गरे भने रोशन पुनले एक गोल थपेका थिए । उता पराजित फर्साटिकरका लागि अवतार थापाले एक मात्र गोल फर्काएका थिए ।

खेलमा गौतम बुद्ध कै सुमित मल्लाह म्यान अफ द म्याच घोषित भए । प्रतियोगिता अन्तर्गत भदौ १७ गते सोमबारको पहिलो सेमिफाइनल खेल खस्यौली फुटबल क्लब, बुटवल र हरैया युवा क्लब, हरैया बीच हुने खेल संयोजक रोशन पुनले जानकारी दिए ।

गौतम बुद्ध सामुदायिक विकास संस्था, कञ्चन–५, पिपरिचापा, रुपन्देहीको आयोजनामा जारी प्रतियोगिताको विजेताले उपाधिसहित नगद १,०१,१११ रुपैयाँ हात पार्नेछ भने उपविजेताले ५५,५५५ रुपैयाँ प्राप्त गर्नेछ । फाइनल खेल भदौ २० गतेका दिन हुनेछ ।