निजगढ । सिस्नेरी पहिरोमा परी गत साता निधन भएका मकवानपुर एन्फा एकेडेमीका बाल खेलाडीहरुप्रति निजगढ फुटबल क्लब, बाराले पनि दिप प्रज्वलसहित श्रद्धाञ्जली अर्पण गरेको छ ।

एक कार्यक्रमका बीच निजगढ एफसीले श्रद्धाञ्जली सभाको आयोजना गरी निधन भएका ६ बाल खेलाडीहरुप्रति दिप प्रज्वलन गरी श्रद्धाञ्जली अर्पण गरेको हो । सो अवसरमा क्लबका पदाधिकारी, खेलाडीसँगै खेलप्रेमी शुभेच्छुकहरुको पनि उपस्थिति रहेको थियो ।

स्मरण रहोस, गत साता अविरल वर्षापछि आएको पहिरोमा परी एन्फाले मकवानपुरको इन्द्रसरोवर गाउँपालिकामा सञ्चालन गरेको एकेडेमीमा प्रशिक्षणरत तथा वात्सलादेवी माविमा अध्ययनरत ६ खेलाडीको निधन भएको थियो ।

पहिरोमा परी निधन हुने बाल खेलाडीमध्ये बिकल रेग्मी निजगढ फटबुल क्लबद्वारा उत्पादित क्षमतावान खेलाडी समेत रहेको क्लबले जनाएको छ । यद्यपि राष्ट्रिय खेलाडी बन्दै देशका लागि विकलसँगै अन्य ६ बाल खेलाडीहरुको सपना पनि पहिरोमा परी तुहिएको छ ।