राजारानी । मंगलबारदेखि शुरु भएको हाम्रो राजारानी अन्तर्राष्ट्रिय आमन्त्रण भेट्रान फुटबल प्रतियोगितामा हाम्रो इटहरी भेट्रान, सुनसरी र आयोजक हाम्रो राजारानी भेट्रान, धनकुटाले विजयी शुरुवात गरेका छन् ।

उद्घाटन खेलमा हाम्रो इटहरीले सागुरीगढी भेट्रान, धनकुटालाई २–१ ले हरायो । हाम्रो इटहरीको जितमा दुवै गोल सन्तोष राईले गरे । उता पराजित सागुरीगढीका लागि भने प्रकाश थापाले गोल गरेका थिए ।

खेलमा हाम्रो इटहरी भेट्रानका सन्तोष राई म्यान अफ दि म्याच चुनिए । उनले त्यसवापत नगद ५ हजार र ट्रफी हात पारे । यो जितसँगै हाम्रो इटहरी भेट्रान सेमिफाइनलमा समेत प्रवेश गरेको छ ।

त्यस्तै दिनको दोस्रो खेलमा हाम्रो राजारानी भेट्रानले एभरेष्ट भेट्रान, मोरङलाई २–० ले हराउँदै सेमिफाइनल सुरक्षित गर्यो । हाम्रो राजारानीको जितमा दुवै गोल बुद्ध चेम्जोङले गरे । चेम्जोङ नै खेलको म्यान अफ दि म्याच पनि चुनिए उनले पनि नगद ५ हजार र ट्रफी हात पारे । यो जितसँगै हाम्रो राजारानी पनि सेमिफाइनलमा प्रवेश गरेको छ ।

त्यसअघि प्रतियोगिताको उद्घाटन चौबिसे गाउँपालिका, राजारानी, धनकुटाका अध्यक्ष राजकुमार चेम्जोङले गरेका थिए । हाम्रो राजारानी भेट्रान, धनकुटाको आयोजनामा शुरु प्रतियोगिताको समापन कार्तिक ३० गतेका दिन हुनेछ ।