ताप्लेजुङको सिरिजङगामा तेल्लोक स्पोर्टिङ क्लबको आयोजनामा शुरू भएको चौथो अन्तरराष्ट्रिय सिरिजङगा गोल्डकपको पहिलो क्वाटरफाइलमा धनकुटालाई पराजित गर्दै आयोजक सेमिफाइनल प्रवेश गरेको छ ।

तेल्लोक मा.वि.को खेल मैदानमा आइतबार सम्पन्न पहिलो क्वाटरफाइनलमा सागुरीगढी धनकुटालाई एकका विरूद्ध दुई गोलले पराजित गर्दै आयोजक तेल्लोक स्पोटिङ क्लब प्रतियोगिताको सेमिफाइनलमा पुगेको हो । आयोजकको जितका लागि क्याप्टेन अनुप सेन्दाङ र दिपेश लिम्बुले एक एक गोल गरे भने धनकुटाका लागि सन्जय लिम्बुले एक गोल फर्काए । खेलको म्यान अफ दि म्याच आयोजकका अनुप सेन्दाङ घोषित भए ।

ऐतिहासिक व्यक्ति तेअङसी सिरिजङगा सिंह थेवेको ३२० औं जन्मजयन्तिको अवसरमा आयोजना गरिएको चौथो सिरिजङगा अन्तराष्ट्रिय आमन्त्रित गोल्डकपमा सोमबार दोस्रो क्वाटर फाइनलमा ब्रदरहुड एफसी उदयपुर र न्यू स्टार झापा भिड्नेछन ।

मंसिर २३ गते देखि सुरू भएको प्रतियोगिता २९ गते सम्म सन्चालनमा रहनेछ । आठ टिम सहभागि रहेको प्रतियोगिताको विजेताले २ लाख ५० हजार ५ सय ५५ सहित ट्रफि र उपविजेताले १ लाख २५ हजार ५ सय ५५ सहित ट्रफि प्राप्त गर्ने तेल्लोक स्पोर्टिङक्लबका अध्यक्ष अर्जुन भट्टराईले जानकारी दिनुभयो ।