काठमाडौं । ललित स्मृति यु–१८ युथ लिग फुटबल प्रतियोगिता समापनको संघारमा आइपुग्दा बुधबार थ्रीस्टार क्लबले रोमाञ्चक जित निकाल्दै लिगतालिकाको तेस्रो स्थानमा उक्लिएको छ ।

एन्फा कम्प्लेक्समा भएको खेलमा थ्रीस्टारले मनाङ मस्र्याङ्दी क्लबलाई २–१ ले हरायो । यो जितपति २१ खेलबाट ४० अंक जोडेको थ्रीस्टार लिगतालिकाको तेस्रो स्थानमा उक्लेको छ । पराजित मनाङ भने २५ अंकका साथ आठौं स्थानमा छ ।

बुधबार नै भएको अर्को खेलमा जावलाखेल युथ क्लब र एफसी खुमलटारले गोलरहित बराबरी खेल्दै अंक बाँडे । यो नतिजापछि २१ खेलबाट २७ अंक जोडेको जावलाखेल लिगतालिकाको सातौं स्थानमा छ । खुमलटार भने १२ अंकका साथ ११औं स्थानमा छ ।

स्मरण रहोस, यस सिजनको युथ लिग उपाधि विभागीय टोली नेपाल पुलिस क्लबले एक खेल अगावै जितिसकेको छ ।