पोखरा । परिवर्तन युवा क्लब, पोखरा २२ को आयोजना र पोखरा हटलाइन राष्ट्रिय दैनिकको सहआयोजनामा आयोजित प्रथम त्रिभुवन कप फुटबल प्रतियोगिताको उपाधि कालाबाङ घरेडीले जित्न सफल भएको छ ।

फाइनल खेलको निर्धारित समयमा दुवै तर्फबाट गोल हुन नसकेपछि खेल टाईब्रेकरमा पुगेको थियो । टाईब्रेकरमा आयोजक परिवर्तन युवा क्लबलाई शून्यका विरुद्ध एक गोलले पराजित गर्दै कालाबाङ घरेडी विजेता बन्यो ।

प्रतियोगितामा परिवर्तन युवा क्लबका समीर गुरुङ उत्कृष्ट खेलाडी भए, उत्कृष्ट गोलरक्षक परिवर्तन युवा क्लबका संजय मल्ल ठकुरीले प्राप्त गरेका छन्। यस्तै सर्वाधिक गोलकर्ताको पुरस्कार कालाबाङ घरेडीका सन्देश तामाङले हात पारे ।

पोखरा हटलाइन राष्ट्रिय दैनिकका प्रकाशक सम्पादक स्वर्गीय त्रिभुवन पौडेलको सम्झनामा आयोजित प्रतियोगिता फागुन १६ गतेदेखि १८ गतेसम्म सञ्चालन भएको थियो । प्रतियोगितामा कास्की र स्याङ्जाबाट कुल २० वटा टिमको सहभागिता रहेको कार्यक्रमका संयोजक सुदिप बरालले जानकारी दिए ।