काठमाडौं । भारतसँग उसकै घरेलु मैदानमा हुने दुई अन्तर्राष्ट्रिय मैत्रीपूर्ण फुटबल म्याच खेल्न त्यसतर्फ जाने नेपाली राष्ट्रिय महिला फुटबल टोलीलाई आइतबार एक कार्यक्रमका बीच विदाई गरिएको छ ।

सातदोबाटो स्थित एन्फा कम्प्लेकसमा भएको एक कार्यक्रमका बीच राष्ट्रिय खेलकुद परिषद् (राखेप) का सदस्यसचिव टंकलाल घिसिङले नेपाली टोलीलाई विदाई गरे । सो अवसरमा अखिल नेपाल फुटबल संघ (एन्फा) का वरिष्ठ उपाध्यक्ष विर बहादुर खड्का, महासचिव किरन राई, कार्यसमिति सदस्यहरु पुरुषोत्तम थापा, रुपेश अधिकारी, सरिला श्रेष्ठ, पेमा डोल्मा लामा लगायतको उपस्थिति रहेको थियो ।

स्मरण रहोस, नेपालले भारतसँग फागुन ३ र ६ गतेका दिन चेन्नईमा दुई अन्तर्राष्ट्रिय मैत्रीपूर्ण म्याच खेल्दैछ । अनुभवी प्रशिक्षक अनन्त थापाको प्रशिक्षकीय जिम्मेवारीमा रहेको नेपाली महिला फुटबल टोलीको सहायक प्रशिक्षकमा पारस चौधरी छन् । त्यस्तै नेपाली टोलीको कप्तानी गोलरक्षक अन्जिला तुम्बापो सुब्बाले गर्ने तय भएको छ ।