काठमाडौं । गत सिजनको शहिद स्मारक ए डिभिजन लिगमा हिमालयन शेर्पा क्लबको सहायक प्रशिक्षकको रुपमा काम गरेका निशान्त ढुंगाना पनि सुनिश्चित भविष्यका लागि विदेश पलायन भएका छन् ।

नेपालको विभिन्न युथ टोलीबाट समेत खेलिसकेका ढुंगाना अमेरिकातर्फ प्रस्थान गरेका हुन् । घरेलु फुटबलमा पनि जगदम्बा लुम्बिनी एफसी, रुपन्देही–११ जस्ता अन्य थुप्रै क्लबहरुबाट व्यवसायीक फुटबल खेलेका ढुंगाना पछिल्लो समय फुटबल प्रशिक्षणतर्फ लागेका थिए ।

एन्फा एकेडेमी बुटवलका उत्पादन समेत रहेका ढुंगाना कै ब्याचमा अहिलेका चर्चित फरवार्ड बिमल घर्ती मगरदेखि लिएर शिव सुवेदी, गौरव बुढाथोकी, सोजित गुरुङ जस्ता खेलाडीहरु पनि सामेल थिए ।

अमेरिकलाई आफ्नो गन्तव्य बनाए पनि नेपाली फुटबल र फुटबल प्रतिको लगावलाई भने जहाँ रहे पनि कायम राख्ने ढुंगानाले आफ्नो प्रतिक्रिया दिए ।