काठमाडौं । थाइल्याण्डको दोस्रो डिभिजनको टोली रायोङ फुटबल क्लबमा अनुबन्धित भएका नेपालका स्टार खेलाडी मनिष डाँगीले थाई लिग टु मा क्लबका लागि शनिबार आधिकारिक डेब्यु गरेका छन् ।

क्लबका लागि शुरुवाती रोजाई मै रहेर खेलेका मनिषले लिगको पहिलो खेल मै सुसुद शुरुवात गर्न पनि सफल भएका छन् । लिगको पहिलो खेल अन्तरगत रायोङले शनिबार लमपङ फुटबल क्लबलाई शून्यका विरुद्ध १ गोलले हरायो ।

रायोङको जितमा म्यानमारका मिडफिल्डर लिन मोइ अङले पहिलो हाफको अतिरिक्त समयमा गरेको एक मात्र गोल टोलीलाई शुरुवाती जित र तीन अंक दिलाउन निर्णायक बन्यो । रायोङले आफ्नो आगामी खेल १९ अगस्त शनिबारका दिन क्रबी फुटबल क्लबसँग खेल्नेछ ।