खडक । यहाँ शुरु प्रथम खडक उपमेयर महिला गोल्डकप नकआउट फुटबल प्रतियोगितामा आयोजक नमो बुद्ध युथ क्लब, सप्तरीले विजयी शुरुवात गरेको छ ।

उद्घाटन खेलमा नमो बुद्धले डाँगीहाट जागृति युवा क्लब, मोरङलाई शून्यका विरुद्ध ४ गोलले हराउँदै विजयी शुरुवात गरेको हो । नमो बुद्धका लागि कुमार तामाङ र संगीता बिकले समान २–२ गोल गरे । खेलमा नमो बुद्धकी कुमारी तामाङ प्लेयर अफ द म्याच घोषित भईन् ।

यो जितसँगै नमो बुद्ध सेमिफाइनलमा समेत प्रवेश गरेको छ । प्रतियोगिता अन्तरगत पुस ३ गते मंगलबारको दोस्रो क्वाटरफाइनल खेल धरान महिला फुटबल क्लब, सुनसरी र बागमती युवा क्लब, सर्लाही बीच हुने आयोजकले जानकारी दियो ।

नमो बुद्ध युथ क्लब, सप्तरीको आयोजनामा जारी प्रतियोगिताको विजेताले उपाधिसहित नगद १०११०१ रुपैयाँ हात पार्नेछ भने उपविजेताले ५११११ रुपैयाँ प्राप्त गर्नेछ । कुल आठ टोलीहरुको सहभागिता रहेको प्रतियोगिताको फाइनल खेल पुस ९ गतेका दिन हुनेछ ।