काठमाडौं । शहिद स्मारक सी डिभिजन लिगबाट मोफसलका दुई टोली आरसी३२ फुटबल एकेडेमी, सुर्खेत र बागमती युवा क्लब, सर्लाही बी डिभिजनमा बढुवा भएका छन् ।

मंगलबार महत्वपूर्ण मानिएको खेलमा पुल्चोक स्पोर्टस क्लबले सानेपा क्लबसँग १–२ को स्तब्धपुर्ण हार बेहोरेपछि आरसी३२ र बागमती एक खेल अगावै बी डिभिजनमा उक्लिने पक्का भएको हो ।

त्यसो त मंगलबार नै भएको अर्को खेलमा आरसी३२ ले रानीबान स्पोर्टस क्लबमाथि ५–० को एकतर्फी जित हात पारेको थियो ।

लिगतालिकामा १२ खेलबाट २६ अंक जोडेको आरसी३२ शिर्ष स्थानमा रहँदा एक खेल कम खेलेको बागमतीको पन समान २६ अंकका साथ दोस्रो स्थानमा छ । मंगलबार सानेपासँग स्तब्ध बनेको पुल्चोक भने २१ अंकका साथ तेस्रो स्थानमा छ र बी डिभिजनमा उक्लिने पुल्चोकको सपना समाप्त भएको छ ।

स्मरण रहोस, बागमतीले सी डिभिजन लिगमा पहिलो सहभागिता मै बी डिभिजनमा उक्लिन सफल भएको हो । उता आरसी३२ ले भने तेस्रो प्रयासमा बी डिभिजनको यात्रा तय गर्न सफल भएको छ ।