बुधबारे । झापा मिडिया कपको उपाधि पत्रकार मञ्च दमकले जितेको छ। भद्रपुर प्रेस क्लबलाई ३-१ गोलअन्तरले पराजित गर्दै दमकले उपाधि जितेको हो ।

बुद्धशान्ति प्रेस क्लबको आयोजनामा भएको मिडिया कपको फाइनल खेलमा जित दर्ता गरेपछि दमकले नगद २५ हजारसहित ट्रफी पाएको छ । उपविजेता भद्रपुरले १५ हजारमा चित्त बुझायो ।

दमकको जितका लागि शिशिर उप्रेतीले दुई गोल गरे भने राम भेटवालले एक गोल गरे। भद्रपुरका लागि रोजन पाठकले एक गोल फर्काएका थिए । प्रतियोगिताको उत्कृष्ट खेलाडी दमकका सुशन राई घोषित भए ।

यसैगरी, उत्कृष्ट मिडफिल्डर दमकका शिशिर उप्रेती, उत्कृष्ट गोलरक्षक दमकका चिरञ्जीवी घिमिरे, उत्कृष्ट डिफेन्डर भद्रपुरका रोजन पाठक, उत्कृष्ट प्रशिक्षक दमकका बादल माझी भए । उनीहरूलाई स्थानीय उत्पादन मुढा र रोङ गाउँपालिकाको उत्पादन गुन्द्रुक र चिया दिइएको थियो।