काठमाडौं । “हाम्रो खेलकुद, हाम्रो स्वास्थ्य” भन्ने नाराका साथ कलेक्सन फुटबल क्लब (सिएफसी), दोहार, कतारको आयोजनामा आउँदो डिसेम्बर ६ तारीखदेखि तेस्रो सिएफसी कप नकआउट फुटबल प्रतियोगिता हुने भएको छ ।

प्रतियोगिताको आवश्यक तयारी पनि अन्तिम चरणमा रहेको आयोजकले पत्रकार सम्मेलनको आयोजना गरी जानकारी गरायो । कुल १५ टोलीहरुको सहभागिता रहने प्रतियोगिताको समापन सन् २०२५ को जनवरी ३ तारीखका दिन हुने पनि आयोजकले जानकारी दियो ।

कतारमा रहेका प्रवासी नेपालीहरुबीच हुने सर्वाधिक धनराशीको यस प्रतियोगिताको विजेताले उपाधिसहित नगद ६,६६६ कतारी रियाल हात पार्नेछ भने उपविजेताले ४,४४४ कतारी रियालसहित ट्रफी, मेडल र प्रमाणपत्र प्राप्त गर्नेछ । त्यस्तै विधागततर्फ पनि आकर्षक पुरस्कारको व्यवस्था गरिएको आयोजकले जानकारी दियो ।