ताप्लेजुङको सिरिजङगामा तेल्लोक स्पोर्टिङ क्लबको आयोजनामा सन्चालित चौथो सिरिजङगा गोल्डकपको दोस्रो क्वाटरफाइलमा न्यू स्टार क्लब झापालाई पराजित गर्दै ब्रदरहुड एफसी बेलका उदयपुर सेमिफाइनल प्रवेश गरेको छ ।

तेल्लोक मा.वि.को खेल मैदानमा सोमबार सम्पन्न दोस्रो क्वाटरफाइनलमा न्यू स्टारलाई एकका विरूद्ध दुई गोलले पराजित गर्दै ब्रदरहुड एफसी प्रतियोगिताको सेमिफाइनलमा पुगेको हो ।

ब्रदरहुडको जितका लागि क्याप्टेन सन्जय श्रेष्ठ र आकास राईले एक एक गोल गरे भने न्यू स्टार झापाका लागि बिदेशि खेलाडी डानियलले एक गोल फर्काए । खेलको म्यान अफ दि म्याच ब्रदरहुड एफसी उदयपुरका सन्जय श्रेष्ठ घोषित भए । श्रेष्ठले नगद दुइ हजार एक सय सहित ट्र्फि प्राप्त गरे ।

ऐतिहासिक व्यक्तित्व तेअङसी सिरिजङगा सिंह थेवेको ३२० औं जन्मजयन्तिको अवसरमा आयोजना गरिएको चौथो सिरिजङगा अन्तराष्ट्रिय आमन्त्रित गोल्डकपमा मंगलबार तेस्रो क्वाटर फाइनलमा मरिक एफसी सुनसरी र पारिजात एफसी भारत भिड्नेछन । मंसिर २३ गते देखि सुरू भएको गोल्डकप २९ गते सम्म सन्चालनमा रहनेछ ।

आठ टिम सहभागि रहेको प्रतियोगिताको विजेताले २ लाख ५० हजार ५ सय ५५ सहित ट्रफि र उपविजेताले १ लाख २५ हजार ५ सय ५५ सहित ट्रफि प्राप्त गर्ने तेल्लोक स्पोर्टिङक्लबका अध्यक्ष अर्जुन भट्टराईले जानकारी दिनुभयो ।