काठमाडौं । ललित स्मृति यु–१८ युथ लिग फुटबल प्रतियोगितामा जावलाखेल युथ क्लब र चर्च ब्वाईज युनाइटेडले जितका साथ लिगको सुखद समापन गरेका छन् ।

आइतबार एन्फा कम्प्लेक्समा भएको पहिलो खेलमा जावलाखेल युथ क्लबले सातदोबाटो युथ क्लबलाई २–० ले हरायो । यो जितपछि २२ खेलबाट ३० अंक जोडेको जावलाखेल लिगतालिकाको सातौं स्थानमा रहेर सिजनको समापन गरेको छ । पराजित सातदोबाटो भने ११ अंकका साथ पुछारमा रहन बाध्य बन्यो ।

अर्को खेलमा चर्च ब्वाईजले मनाङ मस्र्याङ्दी क्लबमाथि शून्यका विरुद्ध १ गोलको झिनो अन्तरको जित निकाल्यो । यो जितपछि २२ खेलबाट २५ अंक जोड्दै लिगतालिकाको आठौं स्थानमा रहेर सिजनको समापन गरेको छ । पराजित मनाङ भने समान २५ अंकका साथ नवौं स्थानमा रह्यो ।

स्मरण रहोस, यु–१८ युथ लिग प्रतियोगिताको उपाधि भने विभागीय टोली नेपाल पुलिस क्लबले यसअघि नै जितिसकेको छ ।