काठमाडौं । सहज जितका साथ मच्छिन्द्र फुटबल क्लब यहाँ जारी दोस्रो केपी ओली कप अन्तर्राष्ट्रिय आमन्त्रण नकआउट फुटबल प्रतियोगिताको फाइनलमा प्रवेश गरेको छ ।

शनिबार भएको दोस्रो सेमिफाइनलमा मच्छिन्द्रले आयोजक केपी फुटबल क्लबलाई शून्यका विरुद्ध ४ गोलले हराउँदै उपाधि नजिक पुगेको हो । मच्छिन्द्रको जितमा ३९औं मिनटमा मनिष डाँगीले पहिलो गोल गरेका थिए । ४९औं मिनटमा रोशन रानाले त्यो अग्रता दोब्बर पारे ।

खेलको अन्तिमतिर स्टेफन जलीले ८५ र ९०औं मिनटमा लगातार दुई गोल गर्दै टोलीको जित सुनिश्चित गरे । मच्छिन्द्रले अब फागुन १९ गते सोमबार हुने फाइनलमा त्रिभुवन आर्मी फुटबल क्लबसँग उपाधिका लागि भिड्नेछ ।

राष्ट्रिय युवा संघ नेपालको आयोजनामा जारी प्रतियोगिताको विजेताले उपाधिसहित नगद १५,११,१११ रुपैयाँ हात पार्नेछ भने उपविजेताले ५ लाख प्राप्त गर्नेछ ।