काठमाडौं । एसियाली फुटबल महासंघले सोमबार निकालेको ड्र अनुसार अर्को वर्ष थाइल्याण्डमा हुने एएफसी यु–२० महिला एसियन कप छनौट प्रतियोगितातर्फ नेपाल समूह ए मा परेको छ ।

अगस्त २ देखि १० तारीखसम्म भुटानमा हुने छनौट प्रतियोगितामा समूह ए तर्फ नेपाल र आयोजक भुटानसँगै साविक विजेता उत्तर कोरिया, मंगोलिया र साउदी अरेयिबा रहेका छन् ।

छनौट प्रतियोगितामा सहभागि कुल ३३ टोलीहरुलाई आठ समूहमा विभाजन गरिएको छ । प्रत्येक समूहको शिर्ष टोली सोझै एएफसी यु–२० महिला एसियन कपका लागि छनौट हुनेछन् । त्यस्तै उत्कृष्ट दोस्रो स्थान हासिल गर्ने तीन टोलीहरु पनि अन्तिम चरणका लागि छनौट हुने छन् ।

स्मरण रहोस, गत संस्करणको उपाधि उत्तर कोरियाले जितेको छ । फाइनलमा उत्तर कोरियाले जापानमाथि २–१ को जित निकाल्दै दोस्रोपटक उपाधि जित्न सफल भएको थियो ।