पोखरा । दोस्रो सूर्य तारा खेलकुद महोत्सव आज देखी पोखरा -२९ लेखनाथको रंगशालामा शुरू भएको छ । सूर्य तारा युवा क्लबको आयोजनामा आज देखी शुरू भएको महोत्सव अन्तर्गत फुटबल प्रतियोगिता प्रतिनिधि सभाका सभामुख देवराज घिमिरेले रेफ्रीलाई बल हस्तान्तरण गरी प्रतियोगिताको शुरूवात गरेका थिए ।
आज भएको उद्धाटन खेलमा सूर्य तारा क्लबले कृष्ण दल गण फुलबारी लाई २-० ले पराजित गर्दै सेमिफाईनलमा प्रवेश गरेको छ । आयोजक सूर्य तारा क्लबको तर्फ बाट बिनम गुरूङ र नकुल तामाङले क्रमस खेलको ३ र ६ मिनेटमा गोल गरेका थिए ।
प्रतियोगितामा बिजेता हुने टिमले नगद ४ लाख ४ हजार ४४४ का साथ ट्रफी, मेडल तथा प्रमाणत्र प्राप्त गर्नेछ भने उपविजेताले नगद २ लाख २ हजार २२२ रुपैयाँ प्राप्त गर्ने आयोजकले जनाएको छ ।
क्लबका अध्यक्ष एवं कार्यक्रम संयोजक विष्णु पुनका अनुसार प्रतियोगितामा खुल्ला सामुहिक लोक नृत्य प्रतियोगिता, खुल्ला महिला स्लो स्कुटर रेस, राष्ट्रिय महिला डोरीतान प्रतियोगिता, खुल्ला टेबल टेनिस प्रतियोगिता र एथलेटिक्सका प्रतिस्पर्धा हुने छ त्यस्तै विभिन्न जातिय संघ/संस्थास्तरीय झाँकी प्रदर्शनी प्रतियोगिता समेत समावेश गरिएको छ ।
प्रतियोगिता अन्तर्गत हुने हरेक प्रतिस्पर्धाहरुमा आकर्षक नगद पुरस्कारका साथमा ट्रफी र मेडल तथा प्रमाणपत्र प्रदान गरिने आयोजकले जनाएको छ ।
पोखरालाई खेलकुदमार्फत समाजका हरेक संग जोड्न महोत्सव महत्वपूर्ण रहने बताउँदै अध्यक्ष पुनले समापन कार्यक्रममा नेपाल सरकार संचार तथा सूचना प्रविधि मन्त्री पृथ्वी सुब्बा गुरूङको प्रमुख आतिथ्यतामा गर्ने तयारी रहेको आयोजकले जनाएको छ ।
