काठमाडौं (एजेन्सी) । उपाधिको दावेदार तथा विश्व विजेता समेत रहेको स्पेन जारी युइएफए महिला युरो च्याम्पियनसिपको सेमिफाइनलमा प्रवेश गर्ने तेस्रो टोली बनेको छ ।

स्वीस शहर बेर्नमा सम्पन्न तेस्रो क्वाटरफाइनलमा स्पेनले आयोजक स्वीजरल्याण्डलाई २–० ले हराउँदै सेमिफाइनलमा प्रवेश गर्ने तेस्रो टोली बनेको हो । खेलमा स्पेनका लागि दुवै गोल दोस्रो हाफमा सम्भव भयो ।

खेलको ६६औं मिनटमा एथेना डेल क्यास्चिलोले स्पेनिस टोलीका लागि पहिलो गोल गरिन् । दोस्रो गोल गर्न भने धेरै समय पर्खनु परेन । खेलको ७१औं मिनटमा क्लाउडिया पिनाले दोस्रो गोल गर्दै टोलीको जित पक्का गरिन् ।

स्पेनले अब शनिबार अबेर राती हुने फ्रान्स र जर्मनी बीचको चौथो क्वाटरफाइनलको विजेतासँग २३ जुलाईका दिन दोस्रो सेमिफाइनल खेल्नेछ । त्यस्तै २२ जुलाईका दिन हुने पहिलो सेमिफाइनलमा भने इङल्याण्ड र इटाली भिड्ने तय भईसकेको छ ।