काठमाडौं । जारी एन्फा यु–१६ युथ लिग फुटबल प्रतियोगितातर्फ शानदार जितका साथ संकटा फुटबल क्लबले आफ्नो शिर्षताको होडलाई कायम राखेको छ ।

बुधबार भएको खेलमा संकटाले त्रिभुवन आर्मी फुटबल क्लबलाई ५–१ को अन्तरले हरायो । यो नतिजापछि १२ खेलबाट २५ अंक जोड्दै संकटा दोस्रो स्थानमा उक्लिएको छ । उता पराजित आर्मी भने ६ अंकका साथ पुछारतिर १२औं स्थानमा छ ।

त्यस्तै अर्को खेलमा प्लानिङ ब्वाईज युनाइटेड र श्री भगवती क्लबले गोलरहित बराबरी खेल्दै अंक बाँडे । यो नतिजापनि पुछारतिरै रहेको प्लानिङ ब्वाईजको १२ खेलबाट ७ अंक भएको छ भने भगवतीको खातामा ११ अंक छ र ११औं स्थानमा छ ।

त्यसैगरी बुधबार नै भएको अर्को खेलमा एपिएफ फुटबल क्लब र मनाङ मस्र्याङ्दी क्लबले १–१ गोलको बराबरी खेल्दै अंक बाँडे । यो बराबरी नतिजापछि १२ खेलबाट २५ अंक जोडेको मनाङ शिर्ष तीन मै छ । उता एपिएफ भने २० अंकका साथ लिगतालिकाको सातौं स्थानमा छ ।