बिर्तामोड । झापाको बिर्तामोडमा दोस्रो संस्करणको बिर्तामोड युनाइटेड च्यालेन्ज कप हुने भएको छ । प्रतियोगिता जेठ अन्तिम साता हुने आज पत्रकार सम्मेलन गरेर जानकारी दिइएको छ ।

आयोजक बिर्तामोड युनाइटेड फुटबल क्लबका अनुसार डोमालाल राजवंशी रंगशालामा हुने प्रतियोगिता जेठ २४ गतेदेखि सुरु हुनेछ । प्रतियोगितामा आठ टिम रहनेछन् । जेठ ३१ गते हुने फाइनल खेलको विजेताले नगद एक लाख ११ हजार १११ रुपैयाँ, मेडल र ट्रफी प्राप्त गर्ने प्रतियोगिता संयोजक अनिश सुवेदीले जानकारी दिए । उपविजेताले नगद ५५ हजार ५५५ रुपैयाँ, मेडल र ट्रफी पाउनेछ ।

प्रत्येक खेलको प्लेयर अफ द म्याचले नगद तीन हजार र ट्रफी पाउनेछ । त्यस्तै, प्रतियोगिताको सर्वोत्कृष्ट खेलाडीले नगद १० हजार र ट्रफी प्राप्त गर्ने क्लबका सचिव सन्तोष राई जानकारी दिए । विधागतर्फ उत्कृष्ट प्रशिक्षक, गोलकिपर, डिफेन्डर, मिड फिल्डर, फरवार्ड र उदीयमान खेलाडीलाई नगद पाँच हजार रुपैयाँ र ट्रफी प्रदान गरिने क्लबले जनाएको छ ।