अफ्रिकन रुटस एसोसिएसन, क्यामरुन वाग्मती युवा क्लब सर्लाही माथि जीत दर्ता गराउदै हेटौंडामा जारी स्थानीय तह सहिद स्मृति अन्तर्राष्ट्रिय फुटबलको सेमिफाइनलमा प्रवेश गरेको छ ।

हेटौंडा–१० स्थित वनविज्ञान अध्ययन संस्थानको खेल मैदानमा सञ्चालित तेस्रो संस्करणको प्रतियोगितामा सर्लाहीलाई क्यामरुनको टोलीले २–१ गोलअन्तरले पराजित गरेको हो । खेलमा अग्रता भने सर्लाहीले लिएको थियो । सर्लाहीका लागि विदेशी खेलाडी स्टेफन समिरले खेलको २५ औं मिनेटमा गोल गर्दै अग्रता दिलाएका थिए । खेलको अन्तिम एक मिनेट सम्हालिन नसक्दा सर्लाही प्रतियोगिताबाट बाहिरन पुग्यो ।

खेलको ८९ औं मिनेटमा क्यामरुनका लागि बेससेकले गोल गरेका थिए । क्यामरुनका लागि लोइसले ९२ औं मिनेटमा गोल गर्दै आफ्नो टिमको जीत सुनिश्चित गरे ।

खेलमा क्यामरुनका मौसा म्यान अफ दी म्याच घोषित भए । उनले नगद दशहजार रुपैया प्राप्त गरे । क्यामरुनको जीतसगै प्रतियोगिताको सेमिफाइनल समिकरण पूरा भएको छ ।

पहिलो सेमिफाइलनमा बुधबार आयोजक मकवानपुर–११ ले मच्छिन्द्र क्लब र क्यामरुनले विहीबार सेमिफाइनलमा त्रिभुवन आर्मी क्बलसग प्रतिस्पर्धा गर्नेछ ।