पोखरा । खेलकुद विकास मञ्च पोखराको आयोजनामा भएको स्व. याम(राम) बहादुर थापा स्मृति प्रथम एमेच्योर फुटसल रनिङ शिल्ड प्रतियोगिताको उपाधि स्टार कफीले जितेको छ ।

 

पोखरा-४. गणेशटोल स्थित स्पोर्टस क्यासलको फुटसल कोर्टमा सम्पन्न फाइनल खेलमा बाइलेज एफसी, लेकसाइडलाई २–१ गोलअन्तरले हराउँदै स्टार कफी च्याम्पियन बन्न सफल भएको हो । 

 

विजेता बनेको स्टार कफीले उपाधिसहित नगद ५० हजार हात पार्यो भने उपविजेता बाइलेजले नगद २५ हजारसहित शिल्ड मेडल र प्रमाणपत्रमा चित्त बुझाउन बाध्य बन्यो ।

 

बाइलेज एफसीका नकुल तामाङ सर्वोत्कृष्ट खेलाडी घोषित भए । बाइलेजकै गोलरक्षक मुमिन तामाङ उत्कृष्ट गोलरक्षक बन्दा स्टार कफीका शन्दिप तामाङले सर्वाधिक गोलकर्ताको ट्रफि हात पारे ।

 

सनराइज एफसीका विरेन पुलामी मगर उदयीमान खेलाडी घोषित भए । उत्कृष्ट सबैले ट्रफि हात पारे । ३६ टिमको सहभागिता रहेको प्रतियोगितामा सनराइज एफसी काठमाडौं अनुसाशित टिम बन्यो ।