काठमाडौं । यु–१६ ए डिभिजन लिग तर्फ शनिबार भर्खरै मोरक्कोमा वल्र्ड स्कुल च्याम्पियनसिप खेलेर फर्किएको संकटा क्लबले सहज जित हात पारेको छ । एन्फा कम्प्लेक्समा भएको खेलमा संकटाले खुमलटारमाथि ५–१ को उत्कृष्ट जित निकालेको हो ।

त्यस्तै च्यासल स्टेडियममा भएको चौथो चरण कै अर्को खेलमा विभागीय टोली सशस्त्र प्रहरीको एपिएफ फुटबल क्लब र चर्च ब्वाईज युनाइटेडले १–१ गोलको रोमाञ्चक बराबरी खेल्दै अंक बाँडे ।

त्यसैगरी च्यासल स्टेडियम मै भएको विभागीय भिडन्तमा नेपाल पुलिस क्लबले त्रिभुवन आर्मी फुटबल क्लबमाथि ६–१ को फराकिलो जित हात पार्यो । लिग अन्तरगत पाँचौं चरणका खेलहरु आउँदो साउन २७ गते हुने एन्फाले सार्वजनिक गरेको खेलतालिकामा उल्लेख छ ।