हेटौडा । अखिल नेपाल फुटबल संघ (एन्फा) ले आयोजना गरेको यु–१९ खुला छनौट कार्यक्रम अन्तरगत अन्तिम चरणका लागि छनौट कार्यक्रममा सहभागि हुने मकवानपुर जिल्लाका खेलाडीहरुलाई विदाई गरिएको छ ।

शनिबार एक कार्यक्रमको आयोजना गरि मकवानपुरबाट अन्तिम चरणका लागि छनौट भएका १३ जना यु–१९ खेलाडीहरुलाई जिल्ला खेलकुद विकास समिति, मकवानपुरले विदाई गरेको हो । सो अवसरमा खेलाडीहरुलाई प्रोत्साहन स्वरुप फुटबल बुट र मोजा पनि हस्तान्तरण गरिएको थियो ।

कार्यक्रममा युवा खेलाडीहरुलाई जिल्ला खेलकुद विकास समिति मकवानपुरका अध्यक्ष भेष खड्गी, बागमती प्रदेश फुटबल संघका महासचिव लोभराज ठकुरी लगायतले शुभकामनासहित विदाई गरे । स्मरण रहोस, यु–१९ को अन्तिम छनौट कार्यक्रम यही साउन २८ गते आइतबारदेखि एन्फा कम्प्लेक्समा शुरु हुँदैछ ।

आउँदो सेप्टेम्बर २१ देखि ३० तारीखसम्म नेपाल मै आयोजना हुन गईरहेको साफ यु–१९ च्याम्पियनसिपतर्फ पाकिस्तान र माल्दिभ्ससँगै नेपाल समूह ए मा परेको छ । त्यस्तै समूह बी मा भारत, भुटान र बंगलादेश रहेका छन् । प्रत्येक समूहको शिर्ष दुई टोली सेमिफाइनलमा प्रवेश गर्नेछन् ।