करमगाछी । आयोजक इलेभन स्टार फुटबल क्लब यहाँ जारी इलेभन स्टार च्यालेञ्ज कप खुला नकआउट फुटबल प्रतियोगिताको सेमिफाइनलमा प्रवेश गर्ने तेस्रो टोली बनेको छ ।

प्रतियोगिताको तेस्रो क्वाटरफाइनलतर्फ इलेभन स्टारले जलजले फुटबल क्लबलाई शून्यका विरुद्ध १ गोलले हराउँदै अन्तिम चारमा प्रवेश गर्न सफल भएको हो । इलेभन स्टारका लागि बिनोद राईले एक मात्र निर्णायक गोल गरे ।

निर्णायक गोलकर्ता बिनोद राई नै खेलको म्यान अफ द म्याच घोषित भए । उनले पुरस्कार वापत नगद ५०० र मेडल हात पारे । प्रतियोगिता अन्तरगत भदौ १० गतेको अन्तिम क्वाटरफाइनल खेल नयाँवस्ती फुटबल क्लब र शिशुबारी फुटबल क्लबबीच हुने आयोजकले जानकारी दियो ।

यही भदौ १६ गतेसम्म चल्ने प्रतियोगिताको विजेताले उपाधिसहित नगद २५ हजार हात पार्नेछ भने उपविजेताले १५ हजारसहित ट्रफी, मेडल र प्रमाणपत्र प्राप्त गर्नेछ ।