काठमाडौं । वनस्थली युथ सोसाईटी र महादेव युथ क्लब यहाँ जारी छैठौं नैकाप गोल्डकप खुला नकआउट फुटबल प्रतियोगिताको क्वाटरफाइनलमा प्रवेश गरेका छन् ।

बुधबार नैकाप खेलमैदानमा भएको पहिलो खेलमा वनस्थलीले बार्सा नेपाललाई २–१ ले हराउँदै क्वाटरफाइनलमा स्थान बनायो । वनस्थलीका लागि बिपन श्रेष्ठ र सुदिप सिख्राकारले गोल गरे ।

पराजित बार्सा नेपालका लागि जिनलब स्याङ्बोले गोल गरेका थिए । खेलमा वनस्थलीका गोलरक्षक एन्जल श्रेष्ठ म्यान अफ द म्याच घोषित भए ।

त्यस्तै दिनको दोस्रो खेलमा महादेव युथले भिमसेन युथ क्लबलाई ६–२ को फराकिलो अन्तरले हरायो । महादेवको जितमा निरव खड्काले ह्याट्रिक गरे भने समिर गुरुङले दुई तथा सबिन कार्कीले थप एक गोल गरे ।

पराजित भिमसेनका लागि दुवै गोल अनिल बलामीले गरे । खेलमा ह्याट्रिक गरेका महादेवका निरव खड्का म्यान अफ द म्याच घोषित भए ।