काठमाडौं । शहिद स्मारक सी डिभिजन लिगतर्फ बिहीबार भएका दुई खेलहरु मध्ये एक खेलमा समाज कल्याण खेलकुद केन्द्रले जित हात पार्दा मनोहरा युनाइटेड र सामाजिक युथ क्लबले बराबरी खेलेका छन् ।

सातदोबाटो स्थित एन्फा कम्प्लेक्समा भएको खेलमा समाज कल्याणले गोलबजार स्पोर्टस क्लबलाई २–१ ले हरायो । समाज कल्याणका लागि दुवै गोल रोशन क्षेत्रीले गरे । पराजित गोलबजारका लागि ओमप्रकाश सिंहले गोल फर्काएका थिए ।

यो जितपछि ७ खेलबाट १२ अंक जोडेको समाज कल्याण लिगतालिकाको शिर्ष तीनमा उक्लिएको छ । उता पराजित गोलबजार भने ५ अंकका साथ १३औं स्थानमा छ ।

त्यस्तै अर्को खेलमा मनोहरा र सामाजिक युथले १–१ गोलको बराबरी खेल्दै अंक बाँडे । खेलमा मनोहराका लागि पुजन चौधरीले गोल गर्दा सामाजिकका लागि बसन्त रानाले गोल गरेका थिए ।

यो नतिजापछि ७ खेलबाट १३ अंक जोडेको मनोहरा लिगतालिकाको दोस्रो स्थानमा उक्लेको छ । उता सामाजिक युथ भने ९ अंकका साथ लिगतालिकाको सातौं स्थानमा छ ।