काठमाडौ । नेपाली राष्ट्रिय महिला फुटबल टोलीले लेबनानमा खेल्ने भनिएको चार देशीय सेडार्स वुमन्स इन्टरनेशनल टुर्नामेन्टमा सहभागिता नजनाउने भएको छ ।

यसअघि केही संचारमाध्यमहरुले पनि नेपालले लेबनानमा नखेल्ने खबर प्रकाशित गरेका थिए । यद्यपि त्यसबारे अखिल नेपाल फुटबल संघ (एन्फा) ले आधिकारिक रुपमा जानकारी गराएको थिएन । तर शनिबार भने यसबारे एन्फाले पनि पुष्टि गरेको छ ।

एन्फाले सुरक्षाको कारण जनाउँदै आउँदो जुलाई ८ देखि १६ तारीखसम्म लेबनानको त्रीपोलीमा हुने फोर नेशन्स कपमा सहभागी नहुने जानकारी गराएको हो । प्रतियोगितामा नेपाल बाहेक आयोजक लेबनान, बंगलादेश र जोर्डनले सहभागिता जनाउने तय भएको थियो साथै प्रतियोगिताको खेलतालीका पनि सार्वजनिक गरिएको थियो ।

त्यस्तै एन्फाले नेपाली महिला फुटबल टोलीका लागि छिटै अर्को अन्तर्राष्ट्रिय प्रतियोगितामा सहभागिताका लागि पहल गर्ने समेत बताएको छ ।