काठमाडौं । विभिन्न खेलकुदहरुमा आफूलाई निरन्तर सक्रिय राख्दै आएको आदर्श स्पोर्टस क्लबले आफ्नो एकेडेमीका लागि विभिन्न खेलकुदका खेलाडीहरुलाई छात्रवृत्ती सहित प्रशिक्षण दिने गरी छनौट कार्यक्रम आयोजना गर्ने भएको छ ।

क्लबले आदर्श विद्या मन्दिर माविसँगको समन्वयमा भर्खरै एसइइ दिएर ११ कक्षामा अध्ययन गर्ने तयारीमा रहेका युवा खेलाडीहरुलाई खेलकुद प्रशिक्षणसँगै अध्ययनको व्यवस्था गरेर छात्रवृत्ती प्रदान गर्न लागेको हो ।

क्लबका सचिव अनुप पाण्डेका अनुसार फुटबल, भलिबल, बास्केटबल र टेबलटेनिस गरी चार खेलका २१ खेलाडीहरुलाई छात्रवृत्तीका लागि छनौट गरिनेछ । साथै उनले क्रिकेट खेलका लागि पनि छिटै कोटा खुलाइने जानकारी दिए ।

इच्छुक खेलाडीहरुलाई आउँदो साउन ८ गतेसम्म नामदर्ता गरिसक्नुपर्ने क्लबका अध्यक्ष राजेश केसीले बताए । साथै छनौट कार्यक्रम साउन ११ गतेदेखि १४ गतेसम्म सञ्चालन हुने पनि अध्यक्ष केसीले जानकारी दिए ।