काठमाडौं । एन्फा युथ लिग फुटबल प्रतियोगिता अन्तर्गत शुक्रबार दुई खेलहरु सम्पन्न भएसँगै प्रतियोगिताको चौथो चरणका खेलहरु पनि सकिएका छन् ।

शुक्रबार एन्फा कम्प्लेक्समा भएको पहिलो खेलमा सातदोबाटो युथ क्लबसँग मनाङ मस्र्याङ्दी क्लबले २–० को हार बेहोर्यो । सातदोबाटोका लागि सोनमछिरिङ गुरुङ्ग र प्रज्वल कार्कीले गोल गरे ।

यो नतिजापछि चार खेलबाट ९ अंक जोडेको मनाङ दोस्रो स्थानमा छ । उता महत्वपूर्ण जित हात पारेको सातदोबाटो भने ४ अंकका साथ सातौं स्थानमा छ ।

त्यस्तै शुक्रबार नै भएको अर्को खेलमा नेपाल पुलिस क्लबले जावलाखेल युथ क्लबमाथि ३–१ को प्रभावशाली जित निकाल्यो । पुलिसका लागि सुवास बमले दुई गोल गरे भने थप एक गोल साजनराज गौतमले गरे । त्यस्तै जावलाखेलका लागि भने निशान राईले एक मात्र गोल फर्काएका थिए ।

यो नतिजापछि ४ खेलबाट १० अंक जोडेको पुलिस लिगतालिकाको शिर्ष स्थानमा छ । उता पराजित जावलाखेल भने २ अंकका साथ पुछारतिर दशौं स्थानमा छ ।