काठमाडौं । एन्फा युथ लिग फुटबल प्रतियोगिता अन्तर्गत एपिएफ फुटबल क्लब र थ्रीस्टार क्लबले आ–आफ्नो खेलहरुमा जित हात पार्दै महत्वपूर्ण तीन–तीन अंक जोडेका छन् ।

शुक्रबार एन्फा कम्प्लेक्समा भएको खेलमा एपिएफले चर्च ब्वाईज युनाइटेडमाथि २–१ को जित हात पार्यो एपिएफका लागि अमन मोक्तान र पवन पाख्रिनले गोल गरे । पराजित चर्च ब्वाईजका लागि भने शिषिर यसमालीले गोल फर्काएका थिए ।

जारी लिगमा तेस्रो जित हात पारेको एपिएफले ८ खेलबाट १० अंक जोड्न सफल भएको छ । उता पराजित चर्च ब्वाईजको भने १३ अंक रहेको छ ।

त्यस्तै शुक्रबार नै भएको अर्को खेलमा थ्रीस्टारले एफसी खुमलटारमाथि शून्यका विरुद्ध ४ गोलको प्रभावशाली जित निकाल्यो । यो जितपछि थ्रीस्टारले ८ खेलबाट १४ अंक जोडेको छ । पराजित खुमलटार भने ३ अंकका साथ पुछारतिरै संघर्षरत छ ।

डबल राउण्ड रोबिन लिगका आधारमा हुने प्रतियोगितामा कुल १२ टोलीहरु सहभागि छन् । लिगको शिर्ष स्थान हासिल गर्ने टोली विजेता बन्नेछ । विजेताले उपाधिसहित नगद १ लाख हात पार्नेछ भने दोस्रो स्थान हासिल गर्ने टोलीले ५० हजार प्राप्त गर्नेछ ।