काठमाडौं । एन्फा महिला लिग राष्ट्रिय फुटबल प्रतियोगितामा शनिबार पाँचौं चरणको शुरुवाती दुई खेल बराबरी नतिजासका साथ सकिएका छन् ।

दशरथ रंगशालामा भएको पहिलो खेलमा दुई विभागीय टोली नेपाल पुलिस क्लब र त्रिभुवन आर्मी फुटबल क्लबले १–१ को बराबरी खेल्दै अंक बाँडे । खेलमा पुलिसका लागि अमृता जैशी र आर्मीका लागि अमिषा कार्कीले गोल गरिन् ।

यो नतिजापछि ५ खेलबाट ११ अंक जोडेको पुलिस शिर्ष स्था नमै यथावत छ । उता आर्मी भने १० अंकका साथ शिर्ष तीन मै कायम छ ।

त्यस्तै शनिबार नै भएको दोस्रो खेलमा संकटा क्लब र कोशी प्रदेशले गोलरहित बराबरी खेल्दै अंक बाँडेका छन् । यो नतिजापछि ५ खेलबाट १० अंक जोडेको कोशी प्रदेश शिर्ष चारमा उक्लिएको छ । उता संकटा भने ५ अंकसहित सातौं स्थानमा छ ।

कुल १० टोलीहरु सहभागि लिग विजेताले उपाधिसहित नगद १० लाख हात पार्नेछ भने उपविजेताले ५ लाख प्राप्त गर्नेछ । त्यस्तै विधागततर्फ पनि आकर्षक नगद पुरस्कारको व्यवस्था गरिएको छ ।