सिमरा । यहाँ जारी चौथो जितपुरसिमरा भेट्रान कप अन्तर्राष्ट्रिय आमन्त्रण नकआउट फुटबल प्रतियोगिताको क्वाटरफाइनल समिकरण पूरा भएको छ ।

बुधबार सिमरा रंगशालामा भएको पहिलो खेलमा एबिसी भेट्रान, पोखराले हाम्रो धरान भेट्रान, सुनसरीलाई टाईब्रेकरमा ३–२ ले हराउँदै क्वाटरफाइनलमा प्रवेश गर्यो । त्यसअघि निर्धारित समयको खेल दुवै टोलीले २–२ गोलको बराबरी खेलेका थिए । निर्धारित समयतर्फ एबिसीका लागि राजकुमार घिसिङ र निलेन्द्र देवानले गोल गरे । उता हाम्रो धरानका लागि दुवै गोल सतिष केसीले गरेका थिए ।

दोस्रो खेलमा नव जनजागृति भेट्रान क्लब, सिमराले हेटौडा भेट्रान्स, मकवानपुरलाई ३–१ ले हराउँदै क्वाटरफाइनलमा स्थान पक्का गर्यो । नव जनजागृतिका लागि ओमपाल सिंहले दुई गोल गर्दा थप एक गोल दिल बहादुर कार्कीले गरे । उता पराजित हटौडाका लागि भने राजेन्द्र थापाले एक मात्र गोल गरेका थिए ।

तेस्रो खेलमा क्लाईव हाउस भेट्रान, कोलकाताले चितवन भेट्रानलाई १–० ले हरायो । क्लाईव हाउसका लागि बिजय अ िधकारीले एक मात्र निर्णायक गोल गरे ।

चौथो खेलमा युनाइटेड बतासिया भेट्रान, दार्जिलिङले बिरगंज सिटी भेट्रानलाई ३–१ ले पराजित गर्यो । क्लाईवका लागि सुदिप राई, नर्बु लामा, ग्याल्सन लामाले गोल गरे । पराजित बिरगंजका लागि भने सुरेश श्रेष्ठले एक मात्र गोल फर्काएका थिए ।

प्रतियोगिता अन्तर्गत असोज ३ गते चारै क्वाटरफाइनल खेलहरु हुने आयोजकले जानकारी दियो । जसअन्तर्गत पहिलो क्वाटरफाइनलमा कटारी टाईगर एफसी, उदयपुरले सिमरा भेट्रान क्लब, सिमराको सामना गर्नेछ भने दोस्रो क्वाटरफाइनलमा रियल भेट्रान सिक्किमले सरस्वती भेट्रान काठमाडौंसँग खेल्नेछ ।

त्यस्तै तेस्रो क्वाटरफाइनलतर्फ एबिसी भेट्रान, पोखराले नव जनजागृति भेट्रान, सिमराको सामना गर्नेछ भने क्लाईव हाउस भेट्रान, कोलकाताले युनाइटेड बतासिया भेट्रान, दार्जिलिङसँग खेल्नेछ ।