काठमाडौँ । यहाँ शुरु दोस्रो प्रयागराज सिंह सुवाल स्मृति अन्तर वडा फुटसल प्रतियोगितामा काठमाडौँ महानगरपालिकाले विजयी सुरुआत गरेको छ ।

लैनचौर फुटसल मैदानमा भएको उद्घाटन खेलमा काठमाडौँ महानगरपालिकाले आयोजक वडा नं २३ लाई टाइब्रेकरमा २–१ ले हरायो । पहिलो दिन भएका अन्य खेलमा वडा नं २ र वडा नं ६ ले पनि जित हासिल गरे ।

काठमाडौँ महानगरपालिका र वडा नं २३ ले निर्धारीत समयको खेलमा १–१ को बराबरीमा खेलेका थिए । अनुप प्रधानले काठमाडौँ महानगरपालिकालाई अग्रता दिलाएका थिए । वडा नं २३ का राजीव चित्रकारले बराबरी गोल गरे । त्यसपछि जित हारको छिनोफानोका लागि भएको पेनाल्टी सुटआउटमा काठमाडौँ महानगरपालिकाले जित हासिल गरी प्रिक्वाटरफाइनलमा स्थान बनायो । खेलमा अनुप प्रधान म्यान अफ द म्याच बने ।

दोस्रो खेलमा वडा नं ९ ले वडा नं २७ लाई २–० ले पराजित गर्यो । विजयी टिमका लागि दुवै गोल मिङमा लामा तामाङले गरे । मिङमा नै म्यान अफ द म्याच चुनिए । तेस्रो खेलमा वडा नं ६ ले वडा नं ११ लाई ३–२ ले निराश बनायो । वडा ६ का लागि विपल्व लामा, दिपेश श्रेष्ठ र केशव भण्डारी तथा वडा नं ११ का जनक कोइारला र रितेश महतोले गोल गरे । सो खेलमा वडा ६ का केशवले म्यान अफ द म्याच घोषित भए ।

यसअघि प्रतियोगिताको उद्घाटन काठमाडौँ महानगरपालिकाकी उपमेयर सुनिता डंगोलले गरेकी थिईन् । काठमाडौँ महानगरपालिका केन्द्रसहित ३१ वडाको सहभागिता रहेको प्रतियोगितामा विजेता टिमलाई ट्रफीसहित दुई लाख रुपियाँ प्रदान गरिनेछ । उपविजेता टिमले एक लाख रुपियाँ प्राप्त गर्नेछ । यसैगरी, विधागततर्फ उत्कृष्ट हुने सर्वश्रेष्ठ खेलाडी, सर्वाधिक गोलकर्ता र सर्वश्रेष्ठ गोलरक्षकलाई जनही दस हजार रुपियाँले पुरस्कृत गरिनेछ ।